Ağdam Sənaye Parkının ərazisində əhəng və perlit istehsalı müəssisəsi yaradılacaq.

Bu barədə iqtisadiyyat naziri Mikayıl Cabbarov "X" sosial şəbəkəsində paylaşım edib.

Nazir bildirib ki, "Ağdağ" MMC-yə Ağdam Sənaye Parkının rezidenti statusu verilib:

"Şirkət tərəfindən Sənaye Parkının ərazisində əhəng və perlit istehsalı müəssisəsi yaradılacaq. İnvestisiya dəyəri 15 milyon manat olan müəssisədə 100 nəfərlik daimi iş yerinin yaradılması nəzərdə tutulur”.

Qeyd edək ki, 2023-cü il üzrə fəaliyyətin yekunlarına həsr olunmuş mətbuat konfransında Azərbaycan İqtisadiyyat Nazirliyi yanında İqtisadi Zonanın İnkişafı Agentliyinin (İZİA) İdarə Heyətinin sədri Seymur Adıgözəlov bildirib ki, bu il Ağdam Sənaye Parkında beşdən artıq müəssisə (divar kağızları, bir neçə növ ayaqqabı, dam örtükləri, boru və qutu profilləri, havalandırma, yanğınsöndürmə avadanlıqları və müxtəlif metal məmulatları istehsalı müəssisələri və s.) işə başlayacaq.

“Rezidentlər tərəfindən sənaye parkına 190 milyon manatdan çox investisiya qoyuluşu və 1700-dən çox iş yerinin yaradılması nəzərdə tutulur. Bu sənaye müəssisələrində istehsal olunacaq məhsullar ilk növbədə daxili tələbatın ödənilməsinə yönəldiləcək, növbəti mərhələdə isə “Made in Azerbaijan” brendi ilə ixrac ediləcək. İndiyədək sənaye parkının rezidentləri tərəfindən 15,3 milyon manatdan çox investisiya qoyulub, 120-yə yaxın daimi iş yeri yaradılıb”.

Əlavə edək ki, Ağdam Sənaye Parkında 21 sahibkarlıq subyektinə rezident, 6 sahibkara isə qeyri-rezident statusu verilib.

Xatırladaq ki, Azərbaycan Respublikasının Prezidenti İlham Əliyevin “Sənaye müəssisələrinin idarə edilməsinin təkmilləşdirilməsi ilə bağlı tədbirlər haqqında” fərmanı ilə “Sumqayıt Kimya Sənaye Parkı” MMC-nin əsasında dövlət hüquqi şəxs kimi İqtisadi Zonaların İnkişafı Agentliyi yaradılıb.