Xəbər verdiyimiz kimi, Prezident İlham Əliyev Serbiyaya səfəri zamanı bu ölkənin dövlət başçısı Aleksandar Vuçiçlə hərbi texnika və avadanlıqlara baxıblar. Serbiya ordusunun arsenalına daxil olan bir sıra silah və hərbi texnikalar nümayiş olunub.

Bəs görəsən Azərbaycan Serbiyadan hansı silah və texnikaları ala bilər?

Hərbi ekspert Ədalət Verdiyev açıqlamasında bildirib ki, Serbiyanın istehsal etdiyi bütün silah sistemləri Türkiyənin müdafiə sənayesinin ixrac portfelində mövcuddur. O düşünmür ki, Azərbaycan hazırda Serbiyadan hansısa silahları əldə etmək üçün konkret müzakirələr aparır:

"Bu ilin yayında Serbiya Prezidenti silah ixracatının dayandırlması barədə bəyanat səsləndirmişdi. Bununla yanaşı, Azərbaycanı Serbiyanın müəyyən silahları maraqlandıra bilər. Bunların arasında üstünlüyü “Nora B-52 M21”artilleriya sistemlərinə verə bilərdim. Bu artilleriya vasitələri "KamAz" şassisi üzərində quraşdırıldığı üçün Azərbaycanın artilleriya sistemlərinə olan tələbatını qarşışlamaq üçün maraqlı təklifdir. Bu, Ermənistanın Fransadan almağa hazırlaşdığı az sayda "Sezar" özüyeriyən artilleriya sistemlərinə cavab reaksiyası ola bilər.  Azərbaycanın silah sahəsində ən geniş əməkdaşlıq etdiyi ölkələrdən biri də İsraildir. Hazırda İsraildə davam edən hərbi əməliyyatlar bu ölkənin ixracatında müəyyən məhdudiyyətlərlə müşahidə oluna bilər. Buna görə ola bilsin ki, Azərbaycan Respublikasının Silahlı Qüvvələrinin Ali Baş Komandanı alternativ variant kimi Serbiya silahlarını nəzərdən keçirib".