İyulun 11-də saat 11:00-dan 2024-2025-ci tədris ili üzrə ümumi təhsil müəssisələrinin məktəbəhazırlıq qruplarına qəbul üçün qeydiyyata start verilir. Qeydiyyat mektebeqebul.edu.az elektron sistemi üzərindən həyata keçiriləcək.
Bunu Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov jurnalistlərə açıqlaması zamanı deyib.

Onun sözlərinə görə, Azərbaycan bölməsi üzrə məktəb və müəllim seçimi 16 iyul saat 11:00-da, tədris digər dillərdə aparılan bölmələr üzrə məktəb və müəllim seçimi isə 18 iyul saat 11:00-da aktiv ediləcək.

Qeyd edək ki, məktəbəhazırlıq qruplarına cari ildə 5 yaşı tamam olan uşaqlar (2019-cu il təvəllüdlü) qəbul edilirlər.

Eşqi Bağırov, həmçinin qeyd edib ki, bu günə qədər www.mektebeqebul.edu.az elektron sistemi vasitəsilə məktəbyaşlı uşaqların 90%-dən çoxu üçün məktəb və müəllim seçimi edilib:

"Elm və Təhsil Nazirliyi, Məktəbəqədər və Ümumi Təhsil üzrə Dövlət Agentliyi və regional təhsil idarələrinin birgə əməkdaşlığı nəticəsində bütün valideynlər üçün övladlarına məktəb seçimində əlçatanlığın təmin edilməsi həyata keçirilir".