Kənd Təsərrüfatı Nazirliyi “Aqrar Məşğulluğun Artırılması Layihəsi”ni (AMAL) 2018-ci ilin oktyabrında ictimaiyyətə təqdim edib. Təqdimatda layihənin kənd yerlərində yaşayan gənclərin aqrar sahədə biznes ideyalarının həyata keçirilməsinə, onların innovativ metodlardan tətbiqinin stimullaşdırılmasına dəstək verən, effektiv və ətraf mühiti qoruyan yeni kənd təsərrüfatı və idarəçilik üsulları barədə məlumatlanmasına yönələn və gənc fermerlərin ilkin kapitalının formalaşmasına şərait yaradan bir təşəbbüs olduğu bildirilib.

Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin və BMT-nin Ərzaq və Kənd Təsərrüfatı Təşkilatının (FAO) həyata keçirdiyi AMAL regionlarda yaşayan gənclərin aqro biznes ideyalarını reallaşdırmaq və sahibkar kimi formalaşmalarına dəstək vermək məqsədi daşıyıb. Layihə çərçivəsində Gənc Fermerlər Proqramı və Kənd Təsərrüfatı Sahəsində Peşə Təhsili Proqramı həyata keçirilməklə, gənclərin məşğulluq imkanlarının artırılması üçün zəruri olan bilik və bacarıqlara sahib olması, texnoloji yeniliklərin tətbiq edilməsi və ətraf mühitin qorunması ilə bağlı müvafiq təlimlərin keçirilməsi nəzərdə tutulmuşdu.

Layihəni həyata keçirən Aqrar Kredit və İnkişaf Agentliyinin (AKİA) məlumatına görə, 2019-cu ilin aprelində İmişli, Bərdə və Zaqatala rayonlarında ilk təlimlərə başlanılıb. Təlimlər biznes ideyalarının işlənməsi və layihələrə çevrilməsi istiqamətindədir. Daha sonra məlumat verilib ki, AMAL-a ölkə üzrə 1000-dən artıq gənc müraciət edib. Bunlardan  400-dən artığı ikinci mərhələyə – təlimlər mərhələsinə keçib. Amal.gov.az saytında yerləşdirilmiş siyahıya görə, ilkin təlim mərhələsinə 20-dən artıq rayondan AMAL-çı seçilib. İmişli, Bərdə və Zaqataladakı təlimlərə 100 nəfərədək iştirakçı qatılıb.

Açıq mənbələrdə AMAL-ın təşkilatçılığı ilə Qəbələ, Oğuz, Biləsuvar, Beyləqan, Samux regionlardan olan 8 nəfər gənc fermerin ölkənin aparıcı arıçılıq təsərrüfatı olan “API DELTA Group” MMC-də təcrübə keçmək imkanı əldə etdiyi yazılır.

Qeyd edək ki, Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin, FAO-nun, Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi də dəstək verirdiyi həssas əhali qruplarından olan şəxslərin özünüməşğulluq və sahibkarlıq imkanlarının genişləndirilməsi məqsədilə icra edilən Aqrar Məşğulluğun Artırılması Layihəsi (AMAL) çərçivəsində bir çox tədbirlər keçirilib. Bir çox rayonlarda keçirilən təlimlərin təşkilinə milyonlarla manat dövlət vəsaiti ayrılıb.

Amma 5 ildən artıqdır həyata keçirilən bu layihə çərşivəsində kənd yerlərində yaşayan gənclərin aqrar sahədə biznes uğurları qazanması barədə heç bir məlumat əldə edə bilmədik. Açıq internet resurslarında belə məlumata rast gəlmədik.

Aqrar Məşğulluğun Artırılması Layihəsinin (AMAL) rəhbəri Elvin Nəbiyevin barəsində isə bir çox maraqlı məlumatlar əldə etdik.

Elektron mediada yayılan məlumatlara görə Nəbiyev Elvin Bahəddin oğlunun qanuni təmsilçisi olduğu “Agrodev” MMC Kənd Təsərrüfatı Nazirliyi Meyvəçilik və Çayçılıq Elmi-Tədqiqat İnstitutunun 2022-ci ilin sentyabr ayının 30-da “Qərzəkli meyvə bitkilərinin in vitro üsulu ilə çoxaldılması texnologiyasının elmi əsaslarının işlənməsinin satın alınması” lotu üzrə keçirdiyi satınalmanın qalibi olub  və 69.561 manat dəyərində dövlət sifarişi alıb. Yenə mediada yazılanlara görə, bu MMC-nin qanuni təmsilçisi Nəbiyev Elvin Bahəddin oğlu eyni zamanda Kənd Təsərrüfatı Nazirliyinin nəzdində olan bir sıra təşkilatlarda rəsmi vəzifə tutur.

Amma  “Dövlət Satınalmaları Haqqında” Azərbaycan Respublikası Qanununa görə:Maddə 6. Satınalmalarda maraqlar toqquşması:

6.1. Təchizatçıların aşağıdakı hallarda satınalmalarda iştirakına yol verilmir: 6.1.1. təchizatçının satınalan təşkilatdan və ya satınalan təşkilatla təchizatçının eyni qurumdan hüquqi, maliyyə və ya təşkilati asılılığı olduqda; 6.1.2. təchizatçılardan biri digərinin benefisiar mülkiyyətçisi olduqda, yaxud təchizatçıların azı ikisi eyni benefisiar mülkiyyətçinin nəzarətində olduqda; 6.1.3. təchizatçılardan biri digərinin idarəetmə orqanının üzvü və (və ya) iştirakçısı olduqda, yaxud təchizatçıların azı ikisinin idarəetmə orqanının üzvü və (və ya) iştirakçısı eyni şəxs olduqda;

Qeyd edək ki, “AgroDev” MMC-nin rəhbəri Elvin Nəbiyev eyni zamanda “OXFHAM” təşkilatının kənd təsərrüfatı layihələri üzrə rəhbəri, eyni zamanda Aqrar Məşğulluğun Artırılması Layihəsinin (AMAL) rəhbəridir.

Elektron mediada yazılanlara görə “AgroDev” MMC Kənd Təsərrüfatı Nazirliyinin tabeliyində fəaliyyət göstərən bir çox qurumların tenderlərində qalib edilib.

Aktualinfo.org-un apardığı araşdırmada məlum oldu ki, “AgroDev” MMC 20.08.2019-cu ildən 12.09.2019-cu ilə, yəni 22 günə Kənd Təsərrüfatı Nazirliyi yanında Aqrar Kredit və İnkişaf Agentliyinin keçirdiyi iki satınalmanın qalibi olub.

Tinglərin alınması (lot 1), istehsal vasitələri və avadanlıqlarının alınması (lot 2), aqro-texniki xidmətlərin göstərilməsi (lot 3), bilik və bacarıqların artırılması (lot 4) üzrə 1.067.525 manat məbləğində satınalma müqaviləsinin bağlanıldığı 20.08.2019 -cu ildə açıqlanıb.

Agro-texniki xidmətlərin göstərilməsi (lot 3) üzrə 1.278.977 manat məbləğində satınalma müqaviləsinin bağlanıldığı 20.08.2019 -cu ildə açıqlanıb.

Bu tenderlər Aqrar Kredit və İnkişaf Agentliyi tərəfindən bir mənbədən satınalma metodu ilə keçirildiyindən milyonlarla manat dövlət vəsaiti ayrılmış xidmətlərin harada həyata keçirilməsi barədə heç bir məlumat yoxdu.

Təsəvvür edin, 5 ildən çoxdur ki, dövlət vəsaitlərini kənd yerlərində yaşayan gənclərin aqrar sahədə biznes ideyalarının həyata keçirilməsinə xərcləyən AMAL-ın Amal.gov.az saytı hələ işləmir. Maraqlıdır, müasir dövrümüzdə hər bir məlumatları internet resuesları üzərində əldə edə bildiyimiz halda, saytı işləməyən AMAL kənd yerlərində yaşayan gənclərin aqrar sahədə biznes ideyalarının həyata keçirilməsi kimi yeni kənd təsərrüfatı və idarəçilik üsulları barədə məlumatlanmanı ictimaiyyətə necə çatdıra bilib?
Xüsusilə qeyd etmək istərdik ki, AMAL Azərbaycan Respublikasının Kənd Təsərrüfatı Nazirliyi və BMT-nin Ərzaq və Kənd Təsərrüfatı Təşkilatının birgə həyata keçirdiyi layihədir. AMAL-ın missiyası gənc liderlərin kənd təsərrüfatı sahəsində sahibkarlıq və özünüməşğulluq imkanlarının artırılmasına dəstək vermək olub. Amma göründüyü kimi AMAL kənd təsərrüfatı sahəsində sahibkarlığın artırılmasına dəstək olmaqdansa Kənd Təsərrüfatı Nazirliyinin rəsmilərinə çoxlu pullar qazandırıb. Onlardan biri də təbii ki, Elvin Nəbiyev olub.

Qeyd edək ki, Kənd Təsərrüfatı Nazirliyi yanında Aqrar Kredit və İnkişaf Agentliyinin sədri Seymur Mövlayevdir. O, 2019-cu ilin yanvarından Aqrar Xidmətlər Agentliyinin sədri təyin olunub. Seymur Mövlayev  daha əvvəl “Aqrolizinq” ASC-nin sədri vəzifəsində, ondan əvvəl isə Bakıda 3 saylı ASAN xidmət mərkəzinin direktoru vəzifəsində çalışmışdır. Sabiq Kənd Təsərrüfatı naziri İnam Kərimovla qohumluq telləri var.

Əldə etdiyimiz məlumatlara görə Elvin Nəbiyevin də sabiq nazirlə qohumluq telləri var. İnam Kərimovun Kənd Təsərrüfatı Nazirliyindən getməsinə baxmayaraq Elvin Nəbiyevin bu yaxınlarda yeni vəzifə ilə mükafatlandırılacağı  gözlənilir.  Bu, ya Kənd Təsərrüfatı Nazirliyində, ya da Dövlət Məşğulluq Agentliyində baş tutacaq.