Elm və Təhsil İşçiləri Həmkarlar İttifaqı Respublika Komitəsinin sədri Araz Paşayev fəaliyyətini elm və təhsil işçilərinin əmək hüquqlarının müdafiəsi, sosial rifahının yüksəldilməsi və həmkarlar ittifaqı sisteminin müasir çağırışlara uyğun inkişaf etdirilməsi istiqamətində qurur. Onun rəhbərliyi dövründə təşkilatda üzvlərə göstərilən xidmətlərin keyfiyyətinin artırılması, rəqəmsal idarəetmə mexanizmlərinin tətbiqi və sosial layihələrin genişləndirilməsi prioritet istiqamətlər kimi müəyyən edilib. 
Araz Paşayev zəngin təhsil və idarəçilik təcrübəsinə malik rəhbərlərdən biridir. Azərbaycan Dövlət Pedaqoji Universiteti, Bakı Dövlət Universiteti və Dövlət İdarəçilik Akademiyasında aldığı təhsil, eləcə də dövlət və təhsil sahəsində müxtəlif vəzifələrdə qazandığı peşəkar təcrübə onun rəhbərlik fəaliyyətinin əsas dayaqlarındandır. 2024-cü ildə Elm və Təhsil İşçiləri Həmkarlar İttifaqı Respublika Komitəsinin sədri seçilərək təşkilatın inkişafına yeni yanaşmalar gətirib. 
Onun rəhbərliyi altında həyata keçirilən layihələr təhsil işçilərinin sosial müdafiəsinin gücləndirilməsinə, istirahət və sağlamlıq imkanlarının artırılmasına yönəlib. Sanatoriya və kurort yollayışları, ekskursiyalar, tur proqramları və digər sosial təşəbbüslər minlərlə ittifaq üzvünün bu imkanlardan faydalanmasına şərait yaradıb. Araz Paşayev dəfələrlə vurğulayıb ki, təhsil işçilərinin rifahı təşkilatın əsas fəaliyyət istiqamətlərindən biridir. 
Respublikanın müxtəlif şəhər və rayonlarında təşkil olunan görüşlər, ilk təşkilat sədrləri ilə keçirilən müzakirələr və açıq dialoqlar həmkarlar ittifaqı ilə üzvlər arasında qarşılıqlı etimadın möhkəmləndirilməsinə xidmət edir. Bu görüşlər zamanı səsləndirilən təkliflərin nəzərə alınması və problemlərin operativ həlli təşkilatın fəaliyyətində şəffaflıq və səmərəliliyin artırılmasına töhfə verir. 
Araz Paşayev eyni zamanda müəllimlərin, alimlərin, təhsil müəssisələri əməkdaşlarının və tələbələrin sosial müdafiəsinin gücləndirilməsini, onların hüquqlarının qorunmasını və həmrəyliyin möhkəmləndirilməsini mühüm vəzifə hesab edir. Bu istiqamətdə həyata keçirilən layihələr həm peşəkar inkişafı, həm də sosial dəstəyi əhatə edən geniş fəaliyyət proqramları ilə diqqət çəkir. 
Elm və təhsil cəmiyyətin inkişafının əsas sütunlarından biridir. Bu sahədə çalışan insanların sosial rifahının və əmək hüquqlarının qorunması isə ölkənin gələcək inkişafı baxımından xüsusi əhəmiyyət daşıyır. Bu baxımdan Araz Paşayevin rəhbərlik etdiyi Elm və Təhsil İşçiləri Həmkarlar İttifaqı Respublika Komitəsinin fəaliyyəti təhsil ictimaiyyətinin maraqlarına xidmət edən mühüm istiqamətlərdən biri kimi qiymətləndirilir. 

Kəmalə Eldarlı

Bsş redaktor