Xəbər verdiyimiz kimi, sosial şəbəkələrdə Moskva vilayətinin Dolqoprudnı şəhərindəki Azərbaycan diasporunun rəhbəri Namus Nağıyevin oğlu Yaşar Nağıyevin yanvarın 20-də erməni restoranında ad gününü keçirdiyi və erməni musiqisinin sədaları altında rəqs etdiyi ilə bağlı görüntülər yayılıb.
Kadrlar Azərbaycan cəmiyyətində narazılıqla qarşılanıb və görüntülər paylaşılaraq tənqid olunub.
Məsələ ilə bağlı Namus Nağıyev yerli mətbuta açıqlama verib.
“Yanvarın 20-də oğlum anadan olub. Xalqımız üçün matəm günü olduğuna görə biz heç vaxt həmin tarixdə ad günü keçirmirik, həmişə yanvarın 21-də qeyd edirik. Oğlum kürd dostunun obyektində doğum gününü qeyd edib. Bütün dostları orada olub, erməni də olub. Gedib oynamağa, elə bilib ki, gürcü musiqisidir. Mən də heç bilməmişəm ki, səsləndirilən erməni musiqisidir”, - o söyləyib.
Namus Nağıyevin sözlərinə görə, videonu təhrif olunmuş formada onu və ailəsini istəməyənlər qəsdən yayıblar.
Maraqlıdır, Yaşar Nağıyev haqqında hansısa bir tədbir görülübmü?
Məsələ ilə bağlı Diasporla İş üzrə Dövlət Komitəsinin təbliğat, informasiya və analitik təhlil şöbəsinin müdiri Vəsilə Vahidqızı "Cebhe.info"-ya açıqlamasında bildirib ki, yanvarın 20-də ad günü keçirilməyib, yayılan məlumatlar doğru deyil.
Bununla yanaşı, Yaşar Nuriyevlə bağlı hər hansı bir tədbir görülüb-görüləməsi ilə bağlı suallarımız cavabsız qalıb.