Azərbaycan xalqının Ümummilli Lideri, müasir dövlətimizin memarı Heydər Əliyev hər zaman xalqına bağlılığı, dövlətçiliyə sadiqliyi və ölkənin davamlı inkişafı üçün həyata keçirdiyi misilsiz xidmətləri ilə tariximizin ən böyük şəxsiyyətlərindən biri kimi xatırlanır. 10 May – Ulu Öndərin doğum günü xalqımız tərəfindən dərin ehtiramla qeyd olunur, onun zəngin siyasi irsi böyük hörmət və minnətdarlıqla anılır.
Bu gün Azərbaycanın bütün sahələrində əldə olunan uğurların əsasında məhz Heydər Əliyevin müəyyən etdiyi inkişaf strategiyası dayanır. Enerji təhlükəsizliyi, sosial rifah, regionların inkişafı və xalqın rahat yaşayışı istiqamətində həyata keçirilən uğurlu siyasət hazırda Prezident İlham Əliyev tərəfindən uğurla davam etdirilir. Bu inkişafın ayrı-ayrı sahələrdə layiqincə həyata keçirilməsində peşəkar rəhbərlərin və fədakar idarəçilərin də xüsusi rolu vardır.
Belə nümunəvi rəhbərlərdən biri də Xaçmaz Regional Qaz İstismar İdarəsinin rəisi Azər Abbasovdur. O, uzun illərdir ki, öz peşəkarlığı, məsuliyyətli fəaliyyəti və vətəndaşlara diqqətli münasibəti ilə kollektivin və rayon ictimaiyyətinin rəğbətini qazanıb. Azər Abbasov rəhbərlik etdiyi idarədə qaz təchizatının dayanıqlılığı, abonentlərin problemlərinin operativ həlli və xidmət keyfiyyətinin yüksəldilməsi istiqamətində mühüm işlər həyata keçirir.
Məlumdur ki, Ulu Öndər Heydər Əliyev daim xalqın sosial rifahının yüksəldilməsini əsas prioritetlərdən biri hesab edirdi. Bu gün regionlarda həyata keçirilən genişmiqyaslı infrastruktur layihələri, insanların rahat yaşayışının təmin olunması və kommunal xidmətlərin müasir standartlara uyğun qurulması həmin siyasətin uğurlu nəticəsidir. Xaçmaz rayonunda qaz təsərrüfatının inkişafı və əhalinin fasiləsiz mavi yanacaqla təmin olunması istiqamətində görülən işlər də bu siyasətin real təzahürüdür.
Azər Abbasov öz fəaliyyətində dövlət maraqlarını hər zaman üstün tutur, kollektivdə sağlam iş mühiti formalaşdırmağa xüsusi önəm verir. Onun rəhbərliyi ilə həyata keçirilən tədbirlər nəticəsində bölgədə qaz şəbəkəsinin texniki vəziyyəti daha da yaxşılaşdırılıb, sakinlərin müraciətlərinə həssas yanaşma təmin olunub. Bu isə əhalinin razılığını qazanan əsas amillərdəndir.
10 May münasibətilə Ulu Öndər Heydər Əliyevin əziz xatirəsini ehtiramla yad edən Azər Abbasov bildirir ki, Azərbaycanın qazandığı bütün uğurların təməlində məhz Heydər Əliyev ideyaları dayanır. Dövlətə və xalqa xidmət prinsipi hər bir rəhbər üçün əsas fəaliyyət meyarı olmalıdır. Bu gün ölkəmizin sürətli inkişafı, xalqımızın rifahı və dövlətimizin beynəlxalq nüfuzu Heydər Əliyev siyasi kursunun uğurlu davamının nəticəsidir.
Ulu Öndərin zəngin dövlətçilik məktəbi gələcək nəsillər üçün də böyük örnək olaraq qalacaq. Azərbaycan xalqı daim Heydər Əliyevin əziz xatirəsini böyük sevgi və sonsuz ehtiramla yad edir. Onun ideyaları isə ölkəmizin inkişaf yoluna işıq saçmağa davam edir.